Advertisement 
|
नेपालमा २ लाख यौन व्यवसायी छन् । जसमध्ये १० प्रतिशत अर्थात् २० हजार पुरुष यौन व्यवसायी रहेको सरकारी तथा विभिन्न सामाजिक संघसंस्थाको अध्ययनले देखाएको छ । बाँकी महिला, तेस्रोलिंगी र समलिंगी यौन व्यवसायी रहेका छन् । पुरुष यौन व्यवसायीबारे नेपाली समाज प्रायः अनविज्ञ भए पनि महिलाको यौन सन्तुष्टि पूरा गरिदिएबापत हजारौँ रकम लिने पुरुष यौन व्यवसायी ठूलो संख्यामा रहेको खुलासा भएको छ ।
नेपालमा रहेका २० हजार पुरुष यौन व्यवसायीमध्ये करिब ५० प्रतिशत पुरुष यौन व्यवसायी काठमाडौं केन्द्रित छन् । तीबाहेक अन्य पुरुष यौन व्यवसायी मोफसलका व्यस्त सहर तथा बोर्डरका बजारमा छन् । पुरुष यौन व्यवसायीका ग्राहक उच्च घरानादेखि उच्च ओहोदासम्ममा पुगेका केही महिला रहेको अध्ययनले देखाएको छ । लाहुरे जीवनको क्रममा विभिन्न मुलुकमा पुगेका पुरुषका श्रीमती, धनाढ्य वर्गका महिला, वैदेशिक रोजगारमा रहेका पुरुषका श्रीमती, श्रीमान्ले छाडेका महिला पुरुष यौन व्यवसायीका दरिलो ग्राहक हुन् । पुरुष यौन व्यवसायीलाई कतिपय महिलाले घरमै बोलाएर तथा कतिपयले क्यासिनो, लक्जरियस होटेल तथा सुरक्षित स्थलमा बोलाएर यौन सन्तुष्टि लिने गरेका छन् ।
एकपटक सेवा दिएबापत १० देखि २५ हजारसम्म
पुरुष यौन व्यवसायीले एकजना महिलालाई यौन सन्तुष्टि दिलाएबापत एकपटकको १० हजारदेखि २५ हजार रुपैयाँसम्म लिने गरेको पाइएको रक्षा नेपालकी अध्यक्ष मेनुका थापाले बताइन् । उनका अनुसार पछिल्लो समय संगठित रूपमा नै पुरुष यौन व्यवसायीहरू सक्रिय भएका छन् । बेरोजगारीका कारण पुरुष यौन व्यवसायमा सक्रिय भएको पाइएको छ । उनीहरूले विदेशमा गएका नेपालीका श्रीमती, आर्थिक रूपमा सम्पन्न परिवारका महिला, लाहुरेका श्रीमती तथा एकल महिलालाई मुख्य निशाना बनाएर मायाजालमा फसाउनेदेखि ग्राहक बनाउने गरेको पाइएको छ । अझ त्यस्ता समुदायका कतिपय महिलाले मसाज सेन्टर, बार तथा रेस्टुरेन्ट, होटेल, क्यासिनो तथा महिला यौन व्यवसायीमार्फत पुरुष यौन व्यवसायी खोज्ने गरेका छन् ।
पुरुष यौन व्यवसायीका ग्राहक आर्थिक रूपमा सम्पन्न परिवारका हुने भएकाले उनीहरूले अन्य सेवासुविधासमेत पाउने गर्छन् । केही पुरुष यौन व्यवसायीको भनाइअनुसार उनीहरूलाई आवश्यक पर्ने पकेट र मोबाइल खर्चदेखि सपिङका लागि पैसा समेत महिला ग्राहकले दिने गरेका छन् ।
ऋण तिर्न यौन व्यवसायमा युवक
जापान जानका लागि गुल्मीका रोहन (नाम परिवर्तन) ले गाउँघरमा भएको पाखोबारी धरौटीमा राखेर जेनतेन १५ लाख ऋण निकाले । उनले दलालमार्फत सबै कागजी प्रक्रिया पूरा गरे । दलालकै लहलहैमा जापान जाने भन्दै १५ लाख ऋण लिई आफ्नी वृद्ध तथा मुटुरोगी आमा छोडेर उनी काठमाडाैँ हुँदै भारतको दिल्ली पुगे ।
जापान लैजाने प्रलोभन देखाउने दलाल त्यहाँबाट सम्पर्कविहीन भएपछि ती गुल्मेली युवक अन्ततः काठमाडाैँ फर्किए । गाउँघरमा जापान जान्छु भनेर हिँडेका ती युवक समाजले हँसिमजाक गर्ने र १५ लाख रुपैयाँ ऋण कसरी तिर्ने भन्ने सोचेर गाउँ फर्किएनन् । उनी काठमाडाैँकै माछापोखरी क्षेत्रमा लुकेर बसे । जापानका विभिन्न सहरका फोटोमा फोटोसपमार्फत मिलाएर आफ्नो फोटो पोस्ट गर्दै आफू जापानमा रहेको जानकारी साथी तथा आफन्तलाई फेसबुकमार्फत गराए । यसो गर्नुको पछाडि आफू जापानमै रहेको खबर मुटुरोगी आमाले थाहा पाउन् र छोराले कमाउनेछ भन्नेमा ढुक्क होउन् भन्ने थियो । अर्कोतर्फ ऋणले उनको मन भतभती पोलिरहेको थियो ।
डिग्री पढ्दै गर्दा छाडेर जापान जाने सपना बुनेका र अन्त्यमा काठमाडाैा माछापोखरी, नयाँबसपार्क क्षेत्रमा बस्न थालेका ती युवकले पैसा कमाउने उपाय सोच्न थाले । त्यसपछि उनी महिला यौनकर्मीको सम्पर्कमार्फत ग्राहक खोज्न थाले । महिला यौनकर्मीमार्फत उनले पुरुष यौनकर्मी पनि हुन्छन्, उनीहरूले हजारौँ लिएर महिलाको यौन आवश्यकता पूरा गरिदिन्छन् भन्ने थाहा पाए । त्यसपछि पुरुष यौन व्यवसायीको भिडमा उनी पनि ग्राहक खोज्न थाले ।
अहिले उनका ५ देखि १० जना महिला निजी ग्राहक छन् । तिनै महिलालाई यौन सन्तुष्टि दिन उनलाई भ्याइनभ्याई छ । एकजनालाई एकपटक यौन सन्तुष्टि दिलाएबापत उनले १० हजार रुपैयाँ लिने गरेका छन् । कोहीसँग भने उनी एक दिनको २५ हजार रुपैयाँसमेत लिने गरेको बताउँछन् । आफ्नो नाम र पूरा ठेगाना नबताउने सर्तमा भेटिएका उनले भने, ‘महिलालाई यौन सन्तुष्टि दिलाएर नै मैले ७ लाख रुपैयाँ ऋण तिरिसकेँ । अब बाँकी ऋण पनि एक वर्षभित्रमा तिरिसक्छु ।’
उनी आफ्ना ग्राहक महिलामाझ रोहन नामले चिनिन्छन् । भन्छन्, ‘मैले यौन सन्तुष्टि पूरा गरिदिएबापत पाउने रकम त छँदै छ, त्योबाहेक पनि म्याडमले अरू बक्सिस दिनुहुन्छ ।’ उनी अझै जापानमै छु भनेर गाउँघरतिर बताइरहेका छन् । आफ्नो यो व्यवसाय गाउँघरमा थाहा पाए बेइज्जत हुने र आमाले थाहा पाए त झनै हार्टअट्याक भएर आमाको मृत्यु हुने डर उनीमा छ । भन्छन्, ‘अहिले ऋण तिर्न नै बाँकी छ । ऋण तिरिसकेपछि बाँकी जीवनबारे सोचौँला ।’
५५ वर्षीय प्रोफेसर पुरुष यौन व्यवसायी
सुन्दा अनौठो र काल्पनिकजस्तो लाग्ने यस्ता घटना नेपाली समाजमा पछिल्लो समय बढिरहेको पाइएको छ । ५५ वर्षीय एकजना वृद्ध प्रोफेसर, जो पैसा लिएर विभिन्न महिलाको यौन सन्तुष्टि पूरा गरिरहेका छन् । रक्षा नेपालकी अध्यक्ष मेनुका थापाका अनुसार काठमाडांैैको एक प्रतिष्ठित कलेजमा पढाउने प्रोफेसर उनको सम्पर्कमा छन् । जो यौन व्यवसायबाट आफूलाई अलग गर्न चाहन्छन् । तर, उनी सकिरहेका छैनन् । अहिले उनी रक्षा नेपालकै सम्पर्कमा साइकोलोजिकल ट्रिटमेन्ट गराइरहेका छन् ।
यस्तो छ प्रोफेसरको वास्तविकता
१४ वर्षको उमेरमा नै विवाह भएकाले प्रोफेसरले अन्य युवतीसँगको प्रेमबारे जीवनमा कहिल्यै सोचेनन् । युवावस्थादेखि नै अध्यापन पेसामा लागे । विभिन्न विषयको थेसिस तयार पार्नेलगायत शैक्षिक कामकै सिलसिलामा उनका विद्यार्थीले उनलाई फोन गर्थे । उनकी श्रीमती एकदमै शंकालु । विद्यार्थीको फोन आउँदा पनि कुनचाहिँ ‘यौनकर्मी’को फोन आयो भन्दै श्रीमान्लाई कराउने, गालीगलोज गर्ने गर्थिन् । ती प्रोफेसर भने यस्ता कुरामा श्रीमतीसँग झगडा गर्दा समाजमा नकारात्मक सन्देश जानेमा सचेत थिए । यसकारण उनले सधैँजसो श्रीमतीले अन्दाजमा शंका गर्दा र आरोप लगाउँदा कहिल्यै कडा प्रतिकार गरेनन् । श्रीमतीको शंकाको दृष्टिकोण सधैँझैँ रहिरहेपछि उनले विक्षिप्त भएर आफ्नो मनको कुरा बुझिदिने महिला पार्टनरको खोजी गर्न थाले । उनका दुई छोरामध्ये एकजना अस्ट्रेलिया र अर्का युकेमा छन् । श्रीमतीसँग छोडपत्रकै अवस्थामा पुगे पनि छोराहरूको आग्रहमा उनले त्यो कदम चालेनन् ।
नभन्दै उनी आफूले अध्यापन गराइरहेको क्याम्पसको एकजना महिला शिक्षिकासँग नजिकिन थाले । ती शिक्षिकाका श्रीमान् पनि जागिरको सिलसिलामा घरबाहिर रहेका कारण उनीसँग प्रोफेसरको घुलमिल बाक्लिन थाल्यो । सम्बन्ध बाक्लिएसँगै उनीहरूबीच यौनसम्पर्क भयो । ती प्रोफेसरले सोही कलेजमा अध्यापन गराउने अन्य शिक्षिकालाई पनि निसाना बनाउन थाले । उनी लगभग ‘यौनलत’मा फसिसकेका थिए । अन्य केही शिक्षिका जसका श्रीमान् जागिरको सिलसिलामा बाहिर रहेका वा अन्य कारण मुलुकबाहिर रहेका थिए । त्यस्ता शिक्षिकालाई पनि उनले आफ्नो ग्राहक बनाए ।
श्रीमतीको एकोहोरो शंका सहन नसकेर उनी घरमा बस्न छाडिदिए । छोराहरूलाई भन्ने वेलामा छुट्टै कोठा लिएर बसेको बताए पनि उनी पालैपालो तिनै महिलाको घरमा बस्थे । घरका अन्य सदस्यले पनि ५५ वर्षीय प्रोफेसर आएको, बसेकोमा कुनै शंका गरेनन् । किनकि उनको उमेरसँगै शरीर पनि पाको बन्दै थियो । घरबाट बाहिर बसेको र छोराहरूको कमाइ पनि अहिलेसम्म नखाएको बताउने ती प्रोफेसरले आफूले यौन सन्तुष्टि पूरा गरिरहेका महिलाबाट आवश्यक पर्ने पैसा लिने गरेको बताए । नयाँपत्रिकाको गज्जबबाट
0 comments
प्रतिक्रिया दिनुहोस्...